Mae Phylip Harries, dêm panto enwog Theatr Clwyd, yn eithaf cyfarwydd â chomedi ar ôl ei 19 mlynedd yn arwain sioe Nadolig flynyddol y theatr yn Sir y Fflint.

Ym mis Ebrill eleni, fodd bynnag, mae'n ymgymryd â rôl newydd fel yr eiconig Malvolio yng nghynhyrchiad newydd Theatr Clwyd o Twelfth Night.

“Rydw i wedi bod yn ffodus iawn o fod wedi perfformio mewn ambell un o ddramâu Shakespeare” meddai Harries i ddechrau, “fe wnes i chwarae Bottom yn A Midsummer Night’s Dream a Dogberry yn Much Ado About Nothing.”

Ond i Harries, mae rôl Malvolio yn freuddwyd. “Mae’n un o rannau comig mawr Shakespeare”, meddai.

Mae Twelfth Night yn stori am efeilliaid sy’n rhan o longddrylliad, camgymryd pwy ydyn nhw, trionglau serch, a thwyll comig. Y cynhyrchiad newydd yma, dan gyfarwyddyd y cyfarwyddwr o Gymru, Juliette Manon, yw’r Shakespeare cyntaf i gael ei gynhyrchu gan Theatr Clwyd ers yr adnewyddu mawr ar yr adeilad. Wedi’i adleoli i westy sydd wedi colli’i sglein o’r 1970au yng Ngogledd Cymru, mae’n addo bod yn fawr, yn feiddgar, yn swnllyd ac yn falch, gyda chariad, yn anad dim, wrth galon y cynhyrchiad.

Ond er bod llawer o gynulleidfaoedd wedi syrthio mewn cariad â Shakespeare, mae eraill yn ystyried ei waith yn anodd. Fodd bynnag, mae Harries yn disgrifio Twelfth Night fel drama sydd ddim yn annhebyg i’r pantomeim, gyda “chyfranogiad y gynulleidfa, cerddoriaeth, clownio a chymeriadau stoc, mawreddog, mae’r cyfan yn nramâu Shakespeare hefyd”.

Yn greiddiol i Twelfth Night mae Malvolio, sy'n enwog am fod yn annymunol ac yn biwritanaidd, yn ddifrifol iawn ac, i'r gynulleidfa, yn ddoniol iawn ar yr un pryd. Mae Harries yn adnabod y paradocs. “Y tric er mwyn gwneud i gymeriad Malvolio weithio” meddai “yw sicrhau’r cydbwysedd priodol rhwng ei rodres a'i naïfrwydd - dim ond os yw'n ymddangos yn ddifrifol ar y dechrau y gall y gomedi weithio”.

Wrth iddo ddychwelyd i'r ystafell ymarfer, rydyn ni’n gofyn iddo sut mae'n mynd ati i weithio ar rôl fel Malvolio, ac mae'n gwenu wrth ateb “boed yn Shakespeare neu'n bantomeim, mae bob amser yn ymwneud â dod o hyd i'r gwir yn y rôl a byw yn y byd hwnnw'n llawn.”

Mae Twelfth Night yn rhedeg yn Theatr Clwyd o nos Sadwrn 25 Ebrill tan nos Sadwrn 16 Mai. Mae tocynnau ar gael o theatrclwyd.com