Deall popeth am Theatr Clwyd?

Yn Theatr Clwyd, ein cenhadaeth ni yw gwneud y byd yn lle hapusach un ennyd ar y tro.

Rydym yn gwneud hyn, nid dim ond drwy'r sioeau o safon byd ar ein llwyfannau, ond drwy gefnogi ein cymunedau a'n hartistiaid. Bob wythnos rydym yn cynnal 25 o raglenni creadigol gwahanol sy'n cyrraedd 500 o bobl rhwng 4 a 98 oed yn ogystal â chynnal sesiynau rhwydweithio a datblygu ar gyfer artistiaid lleol. Mae ein cyrhaeddiad yn ymestyn nid yn unig ar draws ein sir enedigol, Sir y Fflint, ond hefyd mae'n ymestyn i Ogledd Ddwyrain Cymru gan gynnwys Wrecsam, a thros y ffin i Sir Caer.

Rydym wedi cefnogi:

• 96,568 o fynychwyr ar gyfer Gweithgareddau Cymunedol
• 4,947 o docynnau am ddim i Drigolion Sir y Fflint
• 5,513 o blant yn cymryd rhan mewn gwaith ymgysylltu creadigol bob blwyddyn
• 10 hwb cymunedol ledled Sir y Fflint rydym yn eu cefnogi gydag adnoddau i alluogi darpariaeth celfyddydau
• 181 o fwrsarïau am ddim sy'n rhoi mynediad 100% am ddim i weithdai celfyddydau a theatr
• 75 o bobl ifanc fregus sydd ddim mewn addysg wedi cael eu cefnogi i ddod o hyd i lwybr newydd

ac mae ein Hymddiriedolaeth Cerddoriaeth yn Theatr Clwyd wedi cyflawni’r canlynol:

• Derbyniodd 67 o ysgolion wersi dosbarth am ddim
• Derbyniodd 1,900 o blant y gwersi dosbarth am ddim hynny
• Lleihau’r rhestr aros am wersi cerddoriaeth mewn ysgolion 38%

Ein prosiectau

Mae Pŵer ar gyfer pobl ifanc 13 i 16 oed sydd ddim mewn addysg ar hyn o bryd nac yn cael eu haddysgu gartref nac yn mynychu UCD. Rydym yn derbyn atgyfeiriadau gan weithwyr proffesiynol arweiniol, gweithwyr cymdeithasol, Ysgolion Uwchradd Sir y Fflint, UCD a'r Tîm Cynnydd. Drwy sesiynau creadigol mae'r grwpiau'n dysgu hyder a sgiliau bywyd ac yn gwneud ffrindiau newydd. Rydym hefyd wedi dod yn sefydliad Achrededig Gwobr y Celfyddydau yn ddiweddar a bydd criw presennol Pŵer yn derbyn Gwobr Efydd y Celfyddydau.

Mae grwpiau Fuse ar gyfer unigolion sydd ag anabledd neu sydd ag anghenion dysgu ychwanegol ac rydym yn cynnal gwahanol grwpiau yn dibynnu ar yr ystod oedran, gan gynnwys grŵp oedolion. Mae'r grwpiau'n edrych ar lawer o brofiadau gwahanol - o actio a dawnsio i gerddoriaeth a gwaith sgript, a mynd y tu ôl i'r llenni hyd yn oed. Rydym yn cynnig bwrsarïau i'r grwpiau hyn i sicrhau bod pawb yn gallu dod iddyn nhw, beth bynnag yw incwm y cartref.

Mae Celfyddydau o'r Gadair Freichiau yn rhaglen atgyfeirio drwy'r Gwasanaeth Cof ar gyfer pobl sy'n byw gyda cholled cof cynnar, eu gofalwyr a'u teuluoedd. Mae'r sesiynau'n cynnwys archwilio celfyddydau sy'n seiliedig ar y theatr, barddoniaeth, cerddoriaeth, symudiad a chreadigrwydd mewn amgylchedd diogel a chynhwysol.

Mae’r Hybiau Haf yn rhaglen a gynhelir gennym mewn partneriaeth â Gwasanaethau Cymdeithasol Sir y Fflint lle rydym yn darparu sesiynau creadigol mewn amgylchedd diogel a chefnogol. Darperir pryd iach a chludiant lle bo angen i bobl ifanc sy'n cael eu hatgyfeirio at y rhaglen hon.

Chwech Sir y Fflint
Yn 2021, fe wnaethom nodi chwe ardal yn Sir y Fflint a oedd yn uchel ym Mynegai Amddifadedd Lluosog Cymru (MALlC) yn ein hardal uniongyrchol a helpu i sefydlu 10 hwb cymunedol. Rydym yn cefnogi'r ardaloedd hyn gydag adnoddau i alluogi darpariaeth gelfyddydol i bobl na fyddai’n cael y cyfle yma fel arall.

Cyfiawnder
Rydym yn gweithio'n rhagweithiol ym maes cyfiawnder cymdeithasol, ar ôl cyflwyno rhaglenni arloesol ar draws ysgolion cynradd ac uwchradd gyda phartneriaid allanol yn y gorffennol, gan gynnwys Gwasanaethau Cymdeithasol Cyngor Sir y Fflint, ac Ymddiriedolaeth Heddlu a Chymunedol Gogledd Cymru (PACT). Ar hyn o bryd rydym yn ailddatblygu'r rhaglenni hyn i sicrhau ein bod yn cyrraedd y plant mwyaf agored i niwed cyn gynted â phosibl o ran ymyrraeth.

Dyma ychydig o enghreifftiau o'r prosiectau a'r grwpiau rydym yn eu cynnal. Mae’r prosiectau eraill yn cynnwys Dawns ar gyfer Clefyd Parkinson, Our House / Tŷ Ni (grŵp ar gyfer pobl ifanc LHDTQ+), ac rydym yn cynnig bwrsarïau ar gyfer unrhyw un o'n gweithdai y mae angen talu amdanyn nhw.

I gael rhagor o wybodaeth am ein gwaith a'r ffyrdd o gefnogi, ewch i'n tudalen cefnogi ni neu os ydych chi'n Ymddiriedolaeth neu'n Sefydliad Elusennol ac yn awyddus i gyllido ein gwaith, byddem wrth ein bodd yn cael sgwrs. ​​Cysylltwch â Sarah Jones, ein Rheolwr Ymddiriedolaethau a Sefydliadau, ar sarah.jones@theatrclwyd.com

Cyfrannu heddiw!

Fel elusen gofrestredig, sef Theatr Clwyd Trust (Elusen Gofrestredig Rhif 1189857), gallwn hawlio Rhodd Cymorth ar eich rhodd. Mae Rhodd Cymorth yn ffordd wych o allu rhoi ychydig mwy heb unrhyw gost ychwanegol i chi. Os ydych chi’n gymwys ar gyfer Rhodd Cymorth, gallwn hawlio 25% gan CThEM ar ben eich rhodd. Bydd eich rhodd o £10 i ni yn werth £12.50!