Mae Theatr Clwyd wedi lansio menter datblygu artistiaid genedlaethol Cymru, Stiwdio Clwyd, i gefnogi crëwyr theatr ledled Cymru. Yn drobwynt i Gymru, mae'r rhaglen yn darparu datblygiad proffesiynol uchelgeisiol ar gyfer ymarfer artistig, sgiliau technegol ac arloesedd.

1 - Kate Wasserberg (Artistic Director) & Liam Evans-Ford (Executive Director)

Wedi'i chefnogi gan fuddsoddiad sylweddol gan Gyngor Celfyddydau Cymru a Sefydliad John Ellerman, mae Stiwdio Clwyd yn ymateb i'r gydnabyddiaeth bod angen cyfleoedd dysgu deinamig ar grëwyr theatr proffesiynol drwy gydol eu gyrfaoedd. Bydd cyllid hollbwysig yn galluogi artistiaid a gweithwyr llawrydd i gymryd rhan yn y rhaglenni newydd.

Dywedodd Dafydd Rhys, Prif Weithredwr Cyngor Celfyddydau Cymru:

“Mae’r fenter hon yn ymateb wedi’i dargedu i’r anghenion a nodwyd yn yr Adolygiad o Theatr Cyfrwng Saesneg. Pwysleisiodd yr adolygiad hwn fod ecoleg theatr iach yn dibynnu ar ei phobl a nododd fylchau strwythurol o ran rhaglenni mentora a chyfleoedd datblygu gyrfa. O ganlyniad i ymgynghoriad Stiwdio Clwyd gyda mwy na 1,300 o grëwyr theatr, a gyda chonsortiwm o bartneriaid, rydym yn falch o fod yn buddsoddi mewn gosod datblygiad proffesiynol wrth galon twf ein sector.”

Mae rhaglen agoriadol Stiwdio Clwyd yn cynnwys Russell T Davies, Rakie Ayola a Daniel Evans o'r RSC, yn ogystal â phartneriaethau gyda sefydliadau mawr gan gynnwys y National Theatre a Factory International. Mae'r rhaglen yn cyfuno digwyddiadau byw a digidol, cyfleoedd platfform ac adnoddau traws-sector i ddod â chrëwyr theatr at ei gilydd ar draws disgyblaethau. Bydd Stiwdio Clwyd yn cael ei chyflwyno o walesmakestheatre.com ac yng nghartref Theatr Clwyd sydd wedi’i ailddatblygu yn Sir y Fflint.

Dywedodd Suzanne Bell, Cyfarwyddwr Stiwdio Clwyd:

“Mae Stiwdio Clwyd ar gyfer Cymru gyfan. Mae’r sgyrsiau ysbrydoledig rydyn ni wedi’u cael gyda chrëwyr theatr wedi ein harwain ni i greu platfform eclectig ac encil creadigol ar gyfer twf artistig parhaus. Mae cydweithredu, bod yn agored a haelioni artistig wrth galon yr hyn fyddwn ni’n ei gyflawni – dyma ddechrau ein siwrnai ni gyda’n gilydd.”

Mae lansiad Stiwdio Clwyd yn cynnwys y canlynol:

• Codi’r To – Rhaglen gyda thâl i gynllunwyr, cynhyrchwyr, cyfarwyddwyr ac awduron yng nghanol eu gyrfa i gamu ymlaen i greu gwaith ar raddfa fawr drwy gyfnodau preswyl, lleoliadau, gweithdai a mentora.

• Gwreichion - Cynllun pwrpasol sy’n caniatáu i artistiaid gael amser a gofod gyda thâl i gamu oddi ar y felin gerdded creu sioeau i adlewyrchu a dyfnhau eu harfer, wedi’u mentora gan ffigurau blaenllaw yn y diwydiant.

• Ysbrydoli - Cyfres o gyfweliadau manwl gydag arweinwyr celfyddydol gan gynnwys Daniel Evans (RSC), yr actorion Rakie Ayola a’r cyfarwyddwr Jon Gilchrist MBE, gyda Sian Lloyd (BBC).

• Ysgrifennu Gyda… (gyda Theatr y Sherman) – Gofod ar-lein cymunedol i awduron archwilio eu harfer a datblygu eu gwydnwch a'u hatebolrwydd eu hunain. Mae’r siaradwyr gwadd yn cynnwys Russell T Davies a Sian Owen.

• Gair i Gall (gyda Theatr y Sherman) - Cynllun awduron a chyfarwyddwyr yn y Gymraeg i ddatblygu, herio a chryfhau sgriptiau, o syniadau cynnar i gynyrchiadau ar raddfa fawr.

Bydd y rhaglenni blaenllaw hyn yn eistedd ochr yn ochr â lleoliadau, rhwydweithiau mentora, dosbarthiadau meistr ar-lein ac ehangu Rhwydwaith Artistiaid Lleol Theatr Clwyd.

Dywedodd Kate Wasserberg, Cyfarwyddwr Artistig Theatr Clwyd

“Mae Stiwdio Clwyd yn uchelgais ers amser maith gan Theatr Clwyd a sector theatr Cymru. Bydd yn creu newid i genhedlaeth, yn agor gorwelion newydd i artistiaid Cymru ac yn sicrhau bod ein crëwyr theatr ni’n tyfu ac yn helpu i feithrin celfyddyd fywiog, allblyg ac uchelgeisiol yng Nghymru”

Mae Stiwdio Clwyd yn lansio ar 26 Ionawr 2025 ac mae’n cael ei chyllido gan Theatr Clwyd, Cyngor Celfyddydau Cymru, Sefydliad John Ellerman, Sefydliad Cameron Mackintosh, Ymddiriedolaeth Noel Coward a StageOne. Mae’r partneriaid cyfredol yn cynnwys Theatr y Sherman, Theatr Cymru, Frân Wen, Loyalty Arts, y National Theatre, y Royal Shakespeare Company, Canolfan Mileniwm Cymru, Coleg Brenhinol Cerdd a Drama Cymru, Creu Cymru ac RCTC.