Mae Theatr Clwyd wedi cyhoeddi mai eu Cyfarwyddwr Artistig newydd fydd Kate Wasserberg. Yn gyfarwyddwr hynod brofiadol ac uchel ei pharch, Kate oedd Cyfarwyddwr Artistig y cwmni ysgrifennu newydd Stockroom a The Other Room yng Nghaerdydd ac mae wedi cyfarwyddo cynyrchiadau mawr sydd wedi teithio’n genedlaethol ac yn rhyngwladol.

Yn grëwr theatr arobryn, mae gan Kate gysylltiad hir â Theatr Clwyd, gan wasanaethu’r Theatr yn rhagorol fel Cyfarwyddwr Cyswllt o dan arweiniad y diweddar Terry Hands, yn ogystal â chyfarwyddo, yn fwy diweddar, y cynyrchiadau poblogaidd o All My Sons, Insignificance a The Rise and Fall of Little Voice yn y lleoliad yn Sir y Fflint.

Am ei phenodiad dywedodd Kate Wasserberg:
“Rydw i mor falch o gael ymuno â’r tîm anhygoel yn Theatr Clwyd i fynd â’r sefydliad hynod yma ymlaen i ddyfodol disglair. Mae gan Gymru'r artistiaid gorau yn y byd ac mae'n anrhydedd enfawr i mi gael y cyfle i wneud fy nghartref yno. Yn ein hadeilad newydd rhyfeddol, fe fyddwn ni’n creu cartref i gynulleidfaoedd, artistiaid a’r gymuned sydd o safon byd o ran y cynnyrch artistig a’r ffordd mae’n gofalu am bobl. Rydw i wedi gwylio gyda llawenydd y diwylliant o garedigrwydd ac uchelgais sy’n cael ei feithrin yn Theatr Clwyd, ac rydw i eisiau diolch i’r bwrdd am weld ynof i arweinydd a all barhau i adeiladu ar y gwerthoedd yma. Rydw i’n edrych ymlaen gymaint at ddechrau arni!"

Bydd Kate yn gweithio mewn partneriaeth â’r Cyfarwyddwr Gweithredol, Liam Evans-Ford, a ddywedodd:
“Rydw i'n hynod gyffrous. Dim ond rhai o’r rhesymau dros gyffro o’r fath ydi safon creu theatr Kate, yr wybodaeth a’r gwerthfawrogiad sydd ganddi o’r Theatr yng Nghymru a thalentau Cymru, a’i chariad at a’i gwerthfawrogiad dwfn o Theatr Clwyd. Bydd gweithio ochr yn ochr â Kate yn anrhydedd ac rydw i’n sicr, gyda’i harweinyddiaeth artistig hi, y byddwn ni’n adeiladu ar lwyddiant y cwmni, ar y llwyfan ac oddi arno, wrth i ni baratoi i agor ein hadeilad newydd a pharhau i gyflwyno gwaith o ansawdd uchel i’n cymunedau ni.”

Ychwanegodd Cadeirydd Bwrdd Theatr Clwyd, Helen Watson:
“Ar ôl proses recriwtio drylwyr rydyn ni wrth ein bodd gyda phenodiad Kate Wasserberg. Fe wnaeth Kate gryn argraff drwy gydol y broses gyda’i thalent aruthrol, ei henw da amlwg a’i hangerdd dros y Theatr yng Nghymru. Does dim amheuaeth, gyda Chyfarwyddwr Artistig mor fedrus wrth y llyw yn ein theatr ni, y bydd hwn yn gyfnod arbennig iawn i gymunedau, ac yn bennod newydd gyffrous i Theatr Clwyd.”

Mae Kate Wasserberg yn cymryd lle’r cyn Gyfarwyddwr Artistig, Tamara Harvey, sy’n ymuno â’r Royal Shakespeare Company fel Cyfarwyddwr Artistig ar y Cyd yn nes ymlaen eleni.

Kate Wasserberg – Bywgraffiad

Yn un o gyfarwyddwyr mwyaf blaenllaw y DU, roedd yr arobryn Kate Wasserberg yn Gyfarwyddwr Artistig Stockroom, yn Gyfarwyddwr Artistig a sefydlodd The Other Room yng Nghaerdydd ac yn Gyfarwyddwr Cyswllt ar gyfer Theatr Clwyd a’r Finborough Theatre.

Mae ei chynyrchiadau wedi cynnwys y canlynol: The Glee Club, Close Quarters a Rita, Sue and Bob Too (Stockroom); Blasted, The Dying of Today, Play/Silence, Sand a Seanmhair (The Other Room); Aristocrats, Salt, Root and Roe, Glengarry Glen Ross, Roots, Gaslight, Dancing at Lughnasa, Pieces (hefyd Brits Off Broadway), The Glass Menagerie, A History of Falling Things, All My Sons, Insignificance a The Rise and Fall of Little Voice (Theatr Clwyd); Mirror Teeth, The Man,Sons of York, Little Madam, The Representative, I Wish to Die Singing a The New Morality (Finborough Theatre); The Barnbow Canaries (Leeds Playhouse); Ten Weeks (Paines Plough); The Knowledge (Dirty Protest yn y Royal Court); Switzerland (Hightide) a Last Christmas (Gŵyl Caeredin).

Mae Kate wedi ennill dwy o Wobrau Theatr Cymru fel y Cyfarwyddwr Gorau a Chyfarwyddwr Artistig The Other Room yng Nghaerdydd ac enillodd y lleoliad Wobr Papur Newydd The Stage i Theatr Fringe y Flwyddyn. Mae hi’n olygydd ar y cyd Contemporary Welsh Plays, a gyhoeddwyd gan Methuen.

Mae’r prosiectau sydd gan Kate ar y gorwel yn cynnwys Alice in Wonderland wedi’i addasu gan Stockroom (Liverpool Playhouse a’r Theatre Royal Plymouth) a Boys from the Blackstuff gan James Graham (Liverpool Royal Court).