Mae Theatr Clwyd yn falch iawn o gyhoeddi dychweliad ein cynllun Awduron Preswyl hynod lwyddiannus ar gyfer 2024, mewn partneriaeth â Llyfrgell Gladstone.

Rydyn ni’n gartref i awduron yng Nghymru, yn cynnig amser a gofod i ysgrifennu o fewn cymuned o gyd-artistiaid heb y pwysau o ‘ddangos’ neu gynhyrchu rhywbeth. Rydyn ni’n cynnig cyfnodau preswyl sy’n gysylltiedig â’n cynyrchiadau mewnol fel bod awduron yn gallu dod i adnabod artistiaid eraill sy’n gweithio yma, treulio amser yn arsylwi ymarferion a datblygu syniadau mewn amgylchedd cefnogol. Rydyn ni eisiau i’r cyfnodau preswyl yma roi lle i artistiaid chwarae a chreu heb yr angen am ‘ganlyniadau’.

Mae'r cyfnod cyswllt yn cynnwys y canlynol:

• Bwrsari i dalu costau teithio, cynhaliaeth a threuliau
• Llety yn Llyfrgell Gladstone gerllaw (adeilad rhestredig Gradd I hardd a’r unig Lyfrgell Brif Weinidogol ym Mhrydain)
• Desg yn swyddfeydd Theatr Clwyd yng nghanol tref yr Wyddgrug
• Adborth dewisol ar unrhyw waith sydd ar y gweill
• Y potensial i ddychwelyd a gweithio gydag actorion ar unrhyw waith sydd ar y gweill. Bydd hyn gyda’r actorion ar y cynhyrchiad rydych chi’n gysylltiedig ag ef, unwaith y bydd y sioe yn agor (mae hyn yn benodol i’r cynhyrchiad rydych chi’n gysylltiedig ag ef ac ni fyddwn yn gallu cael cwmni actio arall i ddarllen y gwaith).

Mae hwn yn gyfle gwych i dreulio rhywfaint o amser yn ysgrifennu ac yn adlewyrchu ar eich ymarfer, i ni ddod i adnabod ein gilydd ac, os yw’n ddefnyddiol, i gael adborth ar eich gwaith. Nid oes unrhyw rwymedigaeth i chi gynhyrchu unrhyw beth i ni ar ddiwedd y cyfnod cyswllt ac, yn yr un modd, nid oes unrhyw rwymedigaeth arnom ni i gynhyrchu'r gwaith. Ein gobaith ni ydi y bydd y cyswllt yma’n ddechrau ar berthynas gyda Theatr Clwyd a rhwydwaith o awduron a all alw ein theatr ni’n gartref

Mae'r rhaglen yn cael ei rhedeg mewn partneriaeth â Llyfrgell Gladstone.

Cynyrchiadau a Dyddiadau:

Yn 2024, byddwn yn cynnig pedwar cyfnod preswyl sy’n gysylltiedig â’n cynyrchiadau mewnol. Bydd dau awdur ar gyfnod cyswllt gyda ni ar yr un pryd ar gyfer pob un o’r cyfnodau isod:

Constellations gan Nick Payne – Dydd Llun 15 Ebrill – Dydd Gwener 26 Ebrill 2024

Rope gan Patrick Hamilton – Dydd Llun 10 Mehefin – Dydd Gwener 21 Mehefin 2024

Sut i Ymgeisio

Cofiwch mai cyfnod cyswllt datblygiadol ydi hwn – rydyn ni eisiau datblygu perthynas dymor hir gydag awduron a dyma un o sawl ffordd rydyn ni’n gwneud hynny. Mae'r cyfnod cyswllt amdanoch chi, yn hytrach na'r hyn rydych chi’n ei ysgrifennu tra byddwch chi yma.

Rydyn ni’n arbennig o awyddus i glywed gan ddramodwyr sy’n gweithio yn y Gymraeg yn ogystal â dramodwyr o’r mwyafrif byd-eang a dramodwyr sy’n Fyddar a / neu’n anabl.

Sylwer, dim ond i awduron Cymreig a/neu rhai sy'n byw yn Nghymru y mae'r cyfnodau preswyl hyn ar agor.

Os oes gennych chi ddiddordeb mewn ymgeisio, anfonwch e-bost at sam.longville@theatrclwyd.com erbyn 5pm ddydd Iau 21 Mawrth 2024.

Dylai'r e-bost gynnwys y canlynol:

• CV o'ch gwaith fel awdur ac o gyflogaeth arall, hyfforddiant ac addysg
• Disgrifiad byr o ble rydych chi fel awdur ar hyn o bryd
• Disgrifiad byr o'r hyn yr hoffech chi ddefnyddio'r cyfnod preswyl i weithio arno
• Dwy dudalen o sgript rydych chi wedi'i hysgrifennu
• Cadarnhad o'ch argaeledd a pha gynhyrchiad y byddai'n well gennych fod yn gysylltiedig ag ef, a pham

Byddwn yn rhoi gwybod i chi am ganlyniad eich cais erbyn dydd Iau 28 Mawrth.

Rydym yn croesawu ceisiadau yn y Gymraeg ac yn Saesneg.

Cofiwch nad oes posib newid dyddiadau’r cyfnodau preswyl gan fod galw mawr am ystafelloedd yn Llyfrgell Gladstone ac mae ein hwythnosau ymarfer wedi’u cadarnhau. Os na allwch chi ymuno â ni am y cyfnod llawn, ni fyddwn yn gallu cynnig cyfnod preswyl i chi.

Edrychwn ymlaen at glywed gennych chi.